健康係無價寶，人人都鍾意。03年香港遭逢沙士威脅，改變不少港人的價值觀，發覺幾有錢都好，最緊要都係健康。本港醫藥股數目其實不少，只是質素參差，業務涉及不同範疇，投資者給予的評價亦各異。

星俠比較鍾情康健國際（8138）及同系的香港體檢（397），近期兩股走勢俱見蠢動，而且成交大增，似係有好消息尾隨。好似康健國際昨日公佈截至07年12月底頭三季「成績表」，業績彪炳，當然係好消息。期內營業額2.86億元，較上年同期上升47.1%，股東應佔溢利超過1億元，達1.07億元，升57.9%，毛利率達49%，也比去年的47%略多。
康健業務發展穩步上揚，加上成本控制得宜，令毛利率及盈利上升；另集團已完成收購JollyPark在新界西北區21間診所，在港擁有超過100間診所，龍頭地位更穩固。
康健尚未大升，受惠業績理想，股價隨時炒上，現價可買，首站目標0.16元，以0.09元止蝕。