華華聽講,今次拍賣會總共邀請咗480位VIP、合作夥伴、同有份搞上市嘅Banker出席,彤叔嘅富豪朋友亦會參加競投,不過只會用電話出價,唔會高調現身喎。
其實周大福不嬲都有銷售超豪珠寶,喺香港呢啲靚嘢多數係privatesale多,貴客會自己打電話order款式,公司親自拎幾件上去畀佢揀,落舖都搵唔到。喺內地,周大福就喺全國開咗30家貴價珠寶專賣店,招待富豪,聽講貴價珠寶佔周大福整體銷售都有成20%至30%㗎。
周大福今次拍賣會,特別邀請咗內地130位超豪客,佢哋過去一年喺周大福平均消費100萬元,周大福會全程招待佢哋三日兩夜遊香港,又試酒又食好嘢,聽講仲會「一條龍」參觀埋新世界(017)嘅豪宅「名鑄」同K11㖭!呢啲咪叫交叉銷售囉!