讀者楊先生前日下晝5點幾,喺銅鑼灣登龍街嘅寫字樓返工,其間突然見到隔咗兩條街、樓高40層嘅希慎廣場中層位置,有一個着粉紅色衫嘅男仔,企喺平台邊緣,佢背向街,舉起單手唔知做乜,楊先生初時仲以為佢想跳樓,嚇到個心都離一離。
再睇定啲,廿幾秒之後嗰個男仔就放低手,然後企咗一陣,又再行近邊緣,當時都幾大風,件粉紅色衫隨風飄揚,楊先生覺得好牙煙,猶豫緊使唔使報警,其間佢聽到有警車響聲,但唔知係唔係去緊嗰度,好彩冇幾耐個男仔坐低咗,楊先生先鬆一口氣,仲話如果佢真係跳落嚟都唔知點算。
話口未完,粉紅衫男仔又走出啲,今次直頭坐喺平台邊,面向街,兩腳吊吊揈,然後仲多咗個男仔出現,好似拎住部手機幫粉紅色衫男仔影相。楊先生覺得影相唔使咁博吓嘛,咁樣好危險!希慎廣場喺2012年8月10號開幕,商場部份合共17層。