【《G-1格鬥會ll》】大隻余智嘉嚇親參賽者:唔驚就初生之犢不畏虎
HappychikaViuTVG-1格鬥會馬倩宜麥紫莉余智嘉
正喺日本拍緊外景嘅ViuTV節目《G-1格鬥會ll》,繼噚日由麥家琪同麥紫莉分別出戰後,聽日就會進行第二組比賽,由馬倩宜(Happy)對戰梁婉微,同何慈茵對蔡嘉燕。繼早上去海邊玩滑浪晏晝就返到拳館繼續訓練,受傷要坐輪椅嘅麥紫莉都有喺場邊支持。
其中Happy接受訪問時話聽日係比賽日,但心情就唔算緊張,係咪因為對手唔強?佢話:「唔可以咁講,其實反而仲麻煩,因為唔知道對方底細,我最近先知其實對方都有國術底,同埋佢都係一個好進取嘅女仔。」
講到今朝滑浪點解覺得咁密實?佢笑笑口話:「我的腹肌要休息吓,同埋件衫我好鍾意咪着出嚟,之前選比堅尼小姐嘅時候着得太多啦,一件頭都幾性感呀。」聽日就比賽,有冇擔心受傷?佢話:「冇得驚,我以前打柔道都見好多,唯有盡量避免同小心。」對勝出有無信心?佢話:「 雖然準備時間唔多,但我對自己嘅準備係有信心。」又話今次係自己首度出戰MMA:「雖然爸爸唔係好開放好支持,但其實佢都支持我嘅意願,所以我要打好啲。」
另外,余智嘉(Chika)受訪時講到自己係眾參賽者中最高大同重磅,其他參賽者都怕遇上佢,Chika話:「正常嘅,我大隻咁多,唔驚就初生之犢不畏虎啦,因為我哋個身高體重都差得遠,加上我有經驗,雖然唔係MMA比賽,但係巴西柔術同kickboxing我都有參加過比賽,所以佢哋怕都係正常嘅!」
Chika話明白「留力不留手」嘅道理, 會用技術取勝,唔係要置對方於死地。談到麥紫莉受傷,佢話起初直係以為自己打傷佢:「因為我贏佢用Arm Bar,後來知道佢膝頭哥出事,就知道唔關我事!」
講到朝早時以泳衣亮相,問到係咪第一次著泳裝見傳媒?佢話:「唔係,好耐之前試過,我又無操又無減肥,算係咁啦!」