粵首環保（1191）PB平過同類A股一大截，又開始三線滙合，好。粵首主打祖國脫硫環保業，最新NAV0.344元，現價0.156元，折讓54%，PB唔夠1倍。同類A股包括菲達（滬：600526）及龍淨環保（滬：600388），PB講緊3.9倍及3.54倍，粵首折讓，誇張得好離譜。
啱啱喺6月中，環境保護部已經講明，祖國會繼續支持生態環境建設投資規模，包括粵首主打脫硫等八大重點工程，總投資額就講緊3336億銀人仔。呢期阿爺keep住環保政策及投資，粵首係咁意分一杯羮都唔得了。又粵首今年4月三線滙合，股價爆升咗1倍，經呢個幾月整固，10日、20日及50日平均線又再叠埋一齊，等爆邊格局。博粵首翻一番到0.31元，PB仲係企喺1倍樓下，未有耐追到上邊A股嘅PB水位。

渝港短炒一轉博賺30%

渝港國際（613）啱啱公佈09年半年度（6月底止）業績，由上年度同期大出血3.1億銀，轉為獲利2億銀，靚仔到爆。而可供出售投資部份，亦因為市道轉好，倍升到近13億元，計計數，渝港每股額外增值金額8.4仙，而集團股價，都係講緊得9.6仙。呢轉短打博升30%，渝港價見0.124元，NAV折讓仍然高達60%。
錢雋