香港奧運代表團嘅劍擊代表張家朗喺男子花劍16強鬥巴西選手古希美托度果陣，俾主場觀眾喪柴台搞到影響表現；乒乓嘅唐鵬亦都逃唔過呢種命運。到底巴西選手嘅主場威力有幾勁？今次喺里約奧運嘅柴台大概又可以分幾多種呢？答案原來係六種！

1.為咗過癮而噓：無特別原因或者目標㗎，隨時可以轉軚，呢種玩法係咩人都可以噓，個個都可以係柴台對象，簡單嚟講就係完全無路捉。
2.噓熱門：呢樣嘢大家應該唔會覺得陌生，喺倫敦奧運攞男籃銀牌嘅西班牙喺初賽鬥克羅地亞就成為受害者，最終佢哋都輸咗場波。
3.噓俄羅斯：點解俄羅斯會畀觀眾噓，大家心中有數，佢哋有好多運動員被查出食禁藥，但係國際奧委會並無將佢哋一面倒禁賽，有份參加里約奧運嘅俄羅斯運動員，就好自然成為觀眾柴台嘅對象。
4.為政治而噓：呢個都非常容易明白，巴西副總統特默喺開幕禮講嘢果陣就俾人噓爆；如果香港有咩活動，然後「叫我梁特首」出嚟講嘢，相信後果都係差無幾。
5.幫巴西柴對手台：呢啲咪叫主場之利囉，無理由巴西有運動員比賽，主場觀眾都係幫對手打氣㗎，下嘛？
6.噓裁判：呢次嘅情況就出現喺男子雙人10米高台跳水決賽，巴西嘅運動員其實就同其他選手差一截，不過因為今次係里約奧運，巴西嘅跳水運動員都直接獲得一個決賽席位。之不過佢哋嘅表現真係唔多掂，搞到裁判經常都畀勁低分佢哋，主場觀眾唔高興咯，咪又噓囉！