譚凱琪（Zoie）今日去到荔枝角擔任一個中秋節活動嘉賓，並即埸自製燈籠。

Zoie話啱啱完成手頭上劇集，終於可以放假出外玩吓唞吓，問到佢今年中秋係咪同男友人月兩團圓？Zoie話：「我個人比較傳統，鍾意叫埋家人一齊食飯，一家人過好warm，加上家姐有小朋友，o依家屋企人行先多過朋友。」講到最難忘中秋節，Zoie指幾年前去比利時拍旅遊特輯，點知導演同工作人員都不約而同帶咗月餅，跟住一齊賞月過中秋。

Zoie又透露年底將會同龔嘉欣、陳凱琳及沈卓盈等「少婦聯盟」會去拍旅遊特輯，不過地點未定，冬天時間去都可能係浸吓溫泉。