日本型佬福山雅治早排突然同女星吹石一惠結婚，搞到好多女粉絲心碎，有啲仲退出歌迷會等等，福山可能見到婚後流失咗啲粉絲，索性改變形象，喺婚後首部接拍嘅電影當中，竟然扮狗仔隊，仲要係一個爛佬！

福山喺新片《SCOOP！》當中，為人爛到不得了，酗酒、爛賭，借錢借到周身債，不過，佢係一名狗仔隊中嘅精英，為八卦周刊爆料，而戲入面佢會帶領由二階堂富美扮演嘅新人女記者，齊齊做狗仔隊，仲有吉田羊扮演副總編。諷刺嘅係福山被日本傳媒稱為狗仔隊死敵，入行25年極少被狗仔隊影到，佢同老婆吹石一惠秘密拍拖幾年，都冇人影到過佢哋一齊出街，今次佢竟然扮狗仔隊，真係夠晒特別。