總係有一班人，相信自己在獅子山下體現香港精神，永遠在懷念那已逝去的年代，胼手胝足，建設香港(下刪一億字)；對於時下年輕人，他們相信，佢哋係俾人利用、搞亂香港，不惜福，云云。

《獅子山下》，唱了37年。
香港，主權移交了19年。
香港倒退了多少？失去的，比得到的多。

曾任港區人大代表、身兼全國政協委員，現任八和會館主席嘅阿姐汪明荃，不時喺微博貼出同特首梁振英嘅合照。其推廣粵劇嘅苦心同努力，有目共睹；對香港一班「後生」又如何循循善誘苦口婆心，阿姐的取態，亦非常清晰。

2015年5月，顧嘉煇於紅館舉行演唱會，阿姐汪明荃亦任表演嘉賓之一。尾場當晚，阿姐喺台上高呼政改宣傳口號：「2017一定要得！」又講獅子山喇：「煇哥嘅歌就係印證咗獅子山下嘅傳奇，見證咗香港最珍貴嘅年代（略）做各行各業都係要付出嘅，唔係個天跌落嚟畀你哋嘅，我哋要撐香港，最重要撐香港，我哋要撐住呀！」、「年輕嘅朋友，你哋好好彩，因為你哋有前輩同祖父輩為你哋已經創下咗江山，所以你哋要珍惜！」

當時阿姐仲話:「2017一定要得!呢個係大部分香港人嘅心聲，自己一定要撐自己嘅地方，點解要搞亂佢呢，依家香港咁太平、咁盛世嘅一個地方，點解要搞亂。」台下即傳出噓聲，有人大叫：「我要真普選!」汪明荃事後話佢完全聽唔到，佢只係聽到個個都拍晒手。

噚晚，煇哥第二年舉行演唱會，阿姐繼續任嘉賓。仍然係唱《萬水千山總是情》同《獅子山下》。

一年過去，梁振英最大「政績」，是分裂社會，民不聊生。

年初一的旺角黑夜還沒有過去。阿姐仍然沉浸於「依家香港咁太平、咁盛世嘅一個地方，點解要搞亂」的信念中。

噚晚阿姐在台上，對莘莘學子說，一定要讀書，讀書先會更明道理：「唔會為一時衝動，以整個香港利益著想。我每場講嘢都有壓力，因為唔想重複之前歌手講嘅嘢，呢啲係我發自內心，煇哥嘅歌令我哋回顧，我哋呢幾代人幾努力做好香港，要珍惜呀。」

阿姐又話自己前幾日去保良局出席老人活動，見班老人家好有活力，佢直言：「我叫佢哋教下啲仔女、啲孫。不聽老人言，吃虧在眼前，你哋經歷嘅嘢我經歷過晒，要循序漸進、腳踏實地，向前邁進，一齊努力就得啦。」

順手睇埋：
汪明荃促作普選特首諮詢　
http://bit.ly/1XR4mWV