成日話英國人談吐幽默，咁英國作家係咪更勁呢？向來鍾情文化嘢嘅鄧永鏘，今年又請咗四個有份量嘅作家出席書展論壇，其中兩個仲同英國皇室有關係。一個係專門研究英國都鐸王朝（TudorEngland）嘅歷史學者DavidStarkey；另一個係英國美食作家TomParkerBowles，佢媽媽正係英國皇儲查理斯第二個妻子康沃爾公爵夫人卡米拉（Camilla）。登壇者仲有著名散文旅遊作家A.A.Gill，以及出版《名利場》（VanityFair）等著名雜誌嘅出版業巨頭CondeNast常務董事NicholasColeridge。

皇儲嘅繼子阿Tom比較年輕，相信可以同書展年輕一群有多啲話題；至於DavidStarkey熟悉英國皇室歷史，由英女皇伊利沙伯一世到家嘅年輕王妃凱蒂（KateMiddleton），有研究有分析，豈只講得兩嘴。
本身都有爵士銜頭嘅鄧永鏘覺得，香港人講嘢唔係好掂，高官用廣東話答問題都甩甩咳咳，佢唔單止想透過論壇推廣閱讀英文書風氣，仲想公眾有機會同著名作家互動溝通，感受吓講嘢嘅文化，聽吓高手寫作心得。佢拍心口話呢幾位有分量作家唔會講悶嘢，答問題流利兼幽默，實在係一次文化盛會。
平時想同呢啲咁有名氣嘅作家對話，唔係要畀錢出席貴夾唔飽嘅宴會，就係要買500蚊至1,000蚊門券聽講座，鄧永鏘話有興趣者要把握機會。論壇以「HowandWhatandWhyDoWritersWrite」為題，7月22日晚6點喺會展舉行，翌日早上10點港大陸佑堂encore，搵位要快。