曼聯「92班」成員聽日就殺到，魔迷們準備好追星未？傑斯、史高斯、畢特、加利尼維利同菲臘尼維利聽日就會訪港出席兩個公開活動，其實佢哋近日已經聚首一堂，馬不停蹄出席活動，包括周二應博彩公司邀請同曼聯球迷踢衛生波，晚上又去到曼徹斯特市足球博物館（National Football Museum）舉行慈善晚宴。

能夠親身同偶像切磋兩腳已經夠幸福，但有21位16歲學生可能仲幸福！皆因呢5位「92班成員」周一宣佈推出「Academy 92」計劃，獲甄選學員將會獲沙福城（Salford City）教練指導足球技巧，當然唔少得5位間中親自落場指點，而且佢哋搵咗Trafford College作為合作教育夥伴，推動學員練波同時兼顧學業，將來可以銜接足球以外嘅升學或者就業機會，可惜香港球迷暫時無福消受啦。