大家看刁佬個個身光頸靚,出入高級會所,又揸波子又戴撈,風光無限好。但事實係「表面風光,內裏滄桑」,今日刁佬破例和大家講講幾則刁場辛酸史。
刁界中不少人以為投行大佬RO(Responsible Officer)最風光,個個年薪幾百萬都仲未計年終花紅。不過你逗得這份人工,自然要有一定產出,撞啱大市靜焗年中缺刁,大哥您體現不到價值,莫講話年尾無花紅,隨時年尾都未必有得撈,所以市場上才有Mr. Mandate這種刁佬。
Mr.Mandate,人如其名,無論一間公司望落去幾甩皮甩骨幾乎無可能上市,他都要傾盡全力氹老闆簽份Mandate委聘書,開咗波先(唔係點有收成期?)。 然後點?盡做啦。做到咪「恭喜老闆,皇上英明」;做唔到咪話「情況有變,出現了不可預期的重大因素」,結果老闆無咗錢、嘥咗時間,還留下一地蘇州屎。
上唔到市,有上唔到市的煩惱;上到市,也有上到市的煩惱,尤其當你花了一年時間兼幾千萬費用,上市聆訊都過了,包銷商卻說市場淡靜,無法賣出股票,老闆真是「企咗喺度」。開工前還拍心口說全額包銷、絕無問題,一年後變成了「市場瞬息萬變,股票價格可升可跌」?不過,老闆請放心,因為時間關係,已安排好超級財仔撲水兼搵人「啃哂」所有股票。當公司如期上市時,神刁大俠亦連中三元,保薦人費和包銷佣金兩筆自然無走雞,還要「勉為其難」收下融資手續費。
刁佬常說公司上市不是終點,而是真正挑戰的開始,不少上市公司上市時大鑼大鼓,上市後成交低迷無人問津。神刁大俠就會跑出來幫忙推銷股票,不過有拆讓是常識吧。高手們神通廣大,總能找到各路水喉掃貨,那折讓自然成為奬金,至於奬金如何找數,佛曰,不可說。
上市公司莫財發債很常見,發債不難,難在找人買。市場上有不少財務狀況一般、市值得幾億的「潛」力股,無抵押年息僅十厘都大有捧場客,實情是殺頭生意有人做。上市公司場內畀十厘,場外還有十厘「跑山奬金」,債券埋單一年廿厘成本,大家就明白為何有一種債券叫做「垃圾債券」了。
以上種種情況不是新鮮事,只是牛市時大家搵到錢,便無人理會,到市場乾塘問題才一一浮現。有危總有機,當上市公司出現奇難雜症,排難解困的刁佬,才有機會救急扶危兼開單。
作者簡介:
刁佬
遊走在中環黑白之間,自覺是個穿著西裝的古惑仔,在波詭雲譎的金融市場中,鑽研刀不血刃的秘訣。