辦年貨:
新品種賀年盆栽意頭十足

蘋果日報 2002/01/31 00:00


好快到農曆新年,唔少人都會買啲年花返屋企應吓節,唔想擺桔仔桃花咁老套,小記就帶你哋去睇吓幾款今年才引入香港的新款賀年盆栽,佢哋嘅名全部都意頭十足,夠晒應節,而且樣靚襟擺,絕對係今年的好選擇!
記者:何麗儀
攝影:陳偉強、林柏鈞
福祿壽全源源不絕
一提到今年最正賀年花,打理花店的李小姐就全力推介這盆今年最新品種的福祿壽全,皆因福祿壽全衣食足係傳統中國人的最大心願。此盆景來自日本及泰國等地,屬仙人掌類植物,不但賣相特別,容易打理亦是賣點之一,只需每10天至兩星期淋水一次即可,打理得宜更可擺放數年,認真長壽!
花價:$650
連盆售價:$1,080(樂天派)
五代同堂全新造型
大家認識嘅五代同堂通常都係一枝莖上面掛有五隻五代果,但你又有無見過一堆堆嘅五代同堂呢?全新品種嘅五代同堂外貌有趣,每株花莖上都生長了無數細小的五代果,睇落又真係幾似五代同堂一齊影大合照!這盆花不用淋水亦不用施肥,皆因它的根部已被拔掉,作擺設可放三個月。
一棵花價:$30
連盆售價:$280(樂天派)
富貴金蓮商人必備
這盆叫富貴金蓮,是來自雲南西雙版納的亞熱帶植物,是今年新到品種。其花冠又大又有氣勢,直徑有8至10吋長,認真派頭十足。此花糖分高,常招惹金黃蜜蜂,喻意廣招財路。它會長年開花,花莖會不斷生長,花瓣脫落便會見到新生部分。只需每3、4天淋水一次即可,非常容易打理。
連盆售價:$380(山城花藝)
旺財金獅旺丁旺財
旺丁又旺財是不少家庭的新年願望,這盆旺財金獅招財又補身,或許會令你願望成真。它的外形趣怪,有如一隻運財金獅,為人帶來源源不盡的財富。它除了名稱吉利外,本身亦有藥用價值。它是中國高山藥材,表面長有金毛,外敷有止血消腫功效,肉質部分則可作中藥使用,有壯腰補腎之效。種植方法十分簡單,只需每7天淋水一次即可。
連盆售價:$28(細盆)(山城花藝)
紅果引路錦繡前程
紅色代表吉祥歡樂,過年在家擺放這盆有紅紅果實的錦繡前程就最吉利。這種花來自雲南原始森林,是今年新引入香港的品種。紅色果子配厚葉,葉上有紅毛,整盆花看起來有一層紅霞,大有鴻運當頭之意。果子於冬天最盛,和香港農曆年時的氣侯最夾。種植時需用中國唐泥,每5至7天淋水一次,直至泥土完全濕潤為止。
連盆售價:$180(山城花藝)
其他選擇
搖錢樹財運亨通
經濟不景,人人都希望有錢從天而降。如果你想來年財運亨通,不妨擺番盆搖錢樹喺公司幫幫手。呢盆來自荷蘭嘅搖錢樹洋名叫做MoneyTree,雖然小記搖過都唔見佢真係有錢跌過出嚟,不過飽滿嫩綠嘅花葉加上金色蝴蝶結作裝飾又的確幾貴氣。望佢幾眼人都精神啲,做嘢快手自然錢都搵多啲啦!
連盆售價:$120(繽紛)
海棠報春貌似桃花
唔少朋友都鍾意喺新年買桃花,不過放一棵桃花喺屋企會佔了很多位置,倒不如買盆貌似桃花嘅海棠報春應吓節。尚未開花的海棠報春有非常可愛的小花蕾,粉紅色的花蕾襯上形態古雅的花枝,有如小型桃花,非常標致。海棠報春可長年擺放,開花過後只需修剪及施肥,隔年春天又能再開花了。
花價:$350
連盆售價:$890(樂天派)
荷蘭洋水仙又大又搶鏡
傳統中國水仙味道芳香,不過花冠實在太過細少,新年擺放就略嫌不夠氣勢,今年不如揀盆荷蘭洋水仙。呢種水仙有別於中國彰州水仙,它的花香比較淡雅,花冠的直徑約有三吋,造型既清雅又搶眼。
連盆售價:$510(綠與茶)
護理年花知多啲
土養的年花通常都比較容易打理,只需按時淋水便可。如想年花更耐看,便要留意個別花種的養植須知,例如搖錢樹必須放置在光猛地方但不能暴曬;而福祿壽全則屬仙人掌類,故不能淋水太多,故購買時宜查明養法。緊記年花開放期間不能施肥,花謝後可剪去枯萎部分,再次施肥,待次年再開花。


店舖資料
綠與茶(27898682)
旺角太子道西186號A地下

山城花藝(23800703)
旺角花墟道10號A地下

樂天派(23081868)
旺角太子道西180號地下

繽紛(23815330)
旺角花墟道28號地下