好多喜歡賽馬活動嘅朋友，問我點可以睇騎師在陣上試馬、同決心去贏馬嘅分別，呢個其實可以話難，亦可以話易。

對某些高手，特別嗰啲跑平衡力、利用韁繩跑馬嘅騎師，非常困難分辨，一位超級好手，佢騎功集美國同歐洲式於一身，平衡力一流，往往令馬跑得好自然，而且好手會在陣上左check、右check，令馬口痛而唔專心爭逐，馬匹體能可以耗盡。

相反，一啲澳洲騎師，馬踏鐙比較長，動作又大，搏馬同試馬好唔同，其實好容易可以從佢哋身體語言感覺得到，不過，在分析時一定要確定隻馬係唔係完全遭騎師搞到失去爭勝能力，否則就錯怪好人。當然最好自己本身會騎馬，睇得會更入目三分。

今期（11日）特別想介紹第一場五班1400米，「凱旋之星」上仗貝貝在陣上迫隻馬學追一段，感覺追勁唔差，只輸約四個馬位，今仗換韋達加上2檔，鬥志高昂兼好分頭，做首選。

同場「好準確」今季出兩場都入前四名，1400米A跑道啱佢發揮，亦可以爭勝。「金叻星」上仗田少坐低認真騎一下逼出後勁，隻馬反應唔差，復課全由副練、田少親身招呼，有誠意。「四小福」轉羅富完嘅五班馬特別能交出成績，此駒大閘變得好勁，健康毛病轉好，冇保留。

文：沈國成（Now668台賽馬主持；Now668台今期賽日中午12時起直播賽馬直擊）