現年25歲嘅蔡思貝大前年選港姐後，即受無綫力捧上一線，就算把聲高八度、演技亦……不過冇有怕，仍然被大台重用，喺公仔箱老是常出現，由於佢被外界叫佢「發電機」，周不時同合作嘅藝人傳緋聞，包括鄭俊弘、溫家偉、周志文、沈震軒等，之但係佢嘅真命天子似乎係比佢年長十歲、曾任《狂舞派》舞蹈總監麥秋成，二人不時被影到孖住現身，又傳佢哋已同居，以為佢哋打風都打唔甩(新聞連結： http://bit.ly/28PbaoJ )，點知……

今日有周刊爆蔡思貝「漁翁撒網」向黃淑儀孻仔徐肇平埋手，徐肇平生得高大又靚仔，都可以話係圈中乖乖仔，早前同阿媽一齊主持節目，據知佢哋上年經友人介紹識，由於徐肇平都係外國讀完書返嚟，同「鬼妹仔」性格嘅蔡思貝好啱傾，初時佢哋係同成班人出去玩，玩玩吓就變成單獨見面，關係過從甚密。

報道又影到上周日被影到蔡思貝喺中環開工拍劇，估唔到徐肇平都有去探班，蔡思貝亦主動靠近，不過蔡思貝都搵咗同場嘅林師傑掩護，而蔡思貝埋位時，徐肇平亦企埋一邊睇，又幫蔡思貝影相，跟手仲一齊失蹤咗成個鐘，原來係上咗徐肇平架甲蟲車涼冷氣兼短聚，有傳蔡思貝男友麥秋成都收到風勁呷醋，所以成日留喺舞劇學校留到好夜，見人仲有啲面燶燶。