上月初喺台中拍新戲《破風》時炒單車，令左膊兩處骨折嘅陳家樂，今日去到灣仔接受數碼電台訪問，講番膊頭傷勢，佢話：「都好番七至八成，右手舉得起180度，左手都可以舉到170度，只係拎唔到太重嘅嘢。」

經過今次意外，完全都冇嚇怕佢再拍有危險性嘅工作，但就反思今次發生意外原因，係因為自己太興奮，一聽到導演話「Action」，就忘我去踩，完全冇留意身邊環境，0依家經已克服咗踩單車嘅陰影，之後仲會接另一套喺甘肅拍嘅劇，仲需要佢騎馬，好彩之前都學過。受傷後佢接咗幾個廣告，佢話部份係之前接落，有個運動品牌仲好好，將佢講成康復跑手。