韓國男團NU'EST W嘅隊長JR噚日撇甩隊友抵港，今日到銅鑼灣舉行首個個人簽唱會，吸引大批粉絲手持橫額到場支持，場面墟冚。

JR約於下午3時10分、身穿紅黑西裝型Look現身，粉絲隨即以尖叫聲歡迎，JR又不停揮手、鞠躬及派心，之後以廣東話：「大家好，我係JR。」向粉絲打招呼，隨後JR送上親筆簽名碟給予大會，並行到聖誕裝飾前留影，JR又大讚裝飾好靚，想與裝飾自拍留念，相當可愛。

提到今日係首次個人來港出席活動，JR怕醜地表示：「之前都係同隊友一齊嚟，0依家得自己一個所以覺得好緊張，冇諗過有咁多粉絲會嚟，心情好激動、興奮、幸福，多謝大家。」JR表示嚟緊會與隊友一齊過聖誕，又賣口乖收到好多港迷嘅愛，未來會更加努力，盡快再來港開騷報答粉絲，更預祝粉絲「聖誕快樂」。

JR之後又同粉絲玩遊戲，近距離接觸，包括設計聖誕裝飾、擺甫士合照，JR又晒舞技大跳新歌《Help Me》，令粉絲尖叫得更大聲，而JR亦親民握手、送抱。JR隨後又獻唱《With》、《I Hate You》 兩首solo歌曲，引起台下粉絲一齊應援為佢打氣，JR又用英文講「我愛你」冧粉絲，並360度揮手感謝粉絲，又叫粉絲要注意身體健康，唔好感冒。

嘅傳媒訪問環節中，JR表示香港粉絲好熱情，當佢表演時一齊為佢打氣，令佢好感動。JR指來港工作有時間的話會想去購物及睇夜景，並指：「曾經喺某個頒獎禮上見過陳奕迅（Eason）嘅演出，覺得好有型，所以想同對方合作。」之後JR進行簽名環節，為100名幸運送上簽名海報。

精選韓流，喺晒《娛果》
http://fb.com/appledailyent