公民黨主席梁家傑繼早前孖住黨魁楊岳橋訪美後，近日則已聯同民主黨創黨主席李柱銘啟程訪問歐洲議會。成日周圍飛，似足冇腳嘅雀仔，你估唔攰㗎咩？但為咗如實反映香港喺落實「一國兩制」嘅情況，攰啲都在所不計嘞！

據知傑哥已經抵達法國史特拉斯堡，並已同綠黨嘅議員會面。佢喺Facebook話呀，已經初步同綠黨議員交流並分析當前國際形勢，包括保持香港作為一個有別於中國內地嘅關稅區，有幾咁重要。佢認為呢，香港唔單止要能夠繼續擔當歐盟嘅一個可信、可靠商業合作夥伴，更可以成為測試中國係咪履行世界貿易組織（WTO）規定同國際商業合約嘅試金石。

其實歐洲議會一直關心香港狀況，去年12月就經表決通過名為「回歸20年後的香港」嘅議案，話擔心香港自主權受到威脅，傑哥今次出訪前亦預告，唔會刻意唱衰、亦唔會塗脂抹粉。

傑哥仲開埋fb live同大家交代，佢透露原來有左報派咗狗仔隊跟埋佢去歐洲，表明歡迎左報記者現身訪問佢。

係人都知中美貿易戰打打吓隨時搞埋香港，傑哥呢次去歐洲議會，就係想畀對方知道，保持香港喺一國兩制下嗰一制嘅特色係相當緊要，亦希望對方繼續關注關心香港外，一見到香港嘅人權、自由、法治有問題嘅時候要出聲。

傑哥一片苦心，親北京媒體未必領情，好似《大公報》就大字標題話傑哥「唱衰香港、告洋狀」之類。不過傑哥一啲都冇嬲，仲話睇到有關報道先知《大公報》有狗仔隊跟住佢，所以要同《大公報》講「如果你真係有記者想訪問我，我好樂意接受你訪問嘅，你可以行上嚟介紹自己」。

算啦傑哥，慳番啖氣暖肚好過啦，建制陣營係唔會明㗎，佢哋平時鍾意杯葛傳媒，點會明白可以採訪人嘅道理呢。

傑哥最後亦有說話畀國家主席習近平同埋特首林鄭月娥聽，就係提醒佢哋，想成個世界相信中國會履行諸如開放市場呢啲國際協議嘅內容，最好方法就係用行動證明，畀香港早就承諾咗嘅一國兩制、港人治港、高度自治，用香港嚟證明畀世界睇，中國是講口齒的。

立會補選新聞，《蘋果》一網睇晒
http://bit.ly/appledaily1125