（新增回應）靠like搵食嘅袁彌明，當然唔係靠佢嘅「政治BB班」搵食啦。由選港姐嗰陣已經是非不絕，又做埋YouTuber，變過億生意籌上市，你真係當袁彌明流0架？

由前港姐兼前人力主席依家係人妻，09年開始喺網上分享護膚化妝心得，一樽綠粉都可以講一餐，講到開八間舖，由代購零成本創業，聲稱迄今年收入逾億。

一樽綠粉都可以發揮無窮話題，何況係一個人？

日前袁彌明睇完麥明詩喺節目中，講到擔心隨住年紀增長「市值」下跌，又擔心將來老公會有外遇最後拋妻棄子……跟住突然喊出嚟。

喊出嚟嘅係麥明詩，袁彌明主要負責評點，有感而發在fb寫咗篇文，
劈頭第一句就係hashtag：當十優港姐遇上西環契弟。

其實袁彌明應該係想鼓勵麥明詩，以及抱持相同想法／恐懼嘅女性，佢話:「難道女人不能累積經驗和成就，而男人的身體機能不會下降嗎？男人30歲開始appreciate更沒可能是定律。幾多男人30多歲事業到達樽頸，唔上唔落，公司一重組便失業、脫髮、性功能障礙……女人身體變老、生育能力下降是自然不過的過程，變唔變肥則歸咎於運動和飲食，至於appreciate、depreciate是一種看法和選擇。

「知識增長、智慧累積、事業有成、待人處事更成熟、養兒育女，通通是不論男女的appreciate之道。男人跟女人一起老，拒絕原地踏步，同步appreciate，isn't that the best policy？
女人何必妄自菲薄。」

「(略)而一個無安全感的女人再加上『無咗男人乜都無』的想法，等於10號風球+山泥傾瀉，災難上的災難，結果係比個男人100%食住，而呢個時候就是男人放心去滾的時候。」好好好，有道理，但關林作咩事？

袁彌明文章結尾一記鯉魚翻身啄實林作：「當十優港姐遇上一個連頭髮都梳到亂糟糟、分手後仲不斷抽前女友水宣傳的西環契弟，對愛情婚姻悲觀也難怪。#女人depreciate#男人appreciate#無咗男人乜都無#當十優港姐遇上西環契弟」

老老竇竇，袁彌明究竟係想點醒麥明詩定係打稻草人？要問佢本人，但呢個post辣著林作，卻是肯肯定。

林作喺fb 寫道：「其實真係唔係要計較，but Errr excuse me, do I even know you?!」

「人哋感情，需要你咁樣去批判嗎。傳媒點寫，你就信係事實？！重點係，我不斷抽水？！我已經幾多次用以下方式回答問題了？我咁樣係叫抽水借宣傳？！定係你冇事走嚟批評我更加似係chok noise?! 定係我先係不斷俾人抽水？定你先係由選港姐到依家都不斷抽人水？要唔要列返個表俾你呀？定你自己上網搵返嚟睇？

「#每次都係記者提起 #每次都係對方提起 #每次都係你呢啲抽水人提起 #我自己就一直迴避 #唔通我即刻反面 #我又唔係陳冠希 #其實我EQ高 #點解又關西環事 #我住中環」

晚上九時半左右，袁彌明以短訊回覆《蘋果》稱：「未有回應」。至於袁彌明老公林雨陽撐老婆稱：1）有風度既男人唔會講前度；2）我信我老婆既眼光同好多香港人一樣。