雲海喺前日率先爆發話：「商台高層cut走我摩四約二十分鐘節目！事先事後無通知我！直至播出街我才知！這是我完全無法想象（像）！！！亦不能接受的！」據八方了解所得，雲海喺今年六四燭光集會之後，將一幅維園當晚嘅遮陣圖，同埋另一幅好多雨遮嘅圖畫放上微博，結果都被屏蔽，雲海就喺「摩四」公開炮轟微博。
點知商台監製就微博管理員上身，將佢批評微博嘅言論都剪晒，改為播放音樂。商台對外事務部嘅回覆承認的確刪剪節目內容，但理由係根據《電台業務守則》，持牌機構需以負責任嘅態度處理廣播內容。商台認為，有關內容係「主持人對兩間機構提供嘅客戶服務作出私人投訴」，仲話咁樣做係「為確保妥善同公平使用大氣電波」。

雲海嬲到爆，決定封咪。佢以「近日太忙，連書展新書，也趕不起……需要更多時間休息」為理由，向商台請辭。今個禮拜六嘅「摩四」將會係佢嘅最後一集。
雲海喺商台煙消雲散，係聽眾一大損失。一眾粉絲噚日已經發起一人一信，向商台行政總裁陳志雲追究到底。粉絲批評商台踐踏言論自由，損害公眾利益，違反傳媒操守。公開信亦促請商台將刪剪咗嘅內容重新足本播放，否則不排除向廣管局投訴。
當晚節目嘅嘉賓、「港人自決藍色起義」發起人陳梓進都好㷫，佢話雲海評論微博審查言論嘅做法，並唔係「私人投訴」，商台嘅解釋唔合理。佢亦都有去信商台，要求公開交代。

mailto:[email protected]

要瞭解更多六四人和事，為死難者留下悼念的燭光，
請即登入蘋果【六四專頁】: http://6471.appledaily.com/