做球會領隊雖然唔似帶國家隊嘅領隊一樣咁得閒，不過都有可以輕鬆下嘅時間，咁講緊嘅當然就係國際賽檔期喇。呢期要踢世界盃外圍賽，所以車路士領隊干地都好得閒，仲帶埋老婆齊齊去度假「梳乎」！

不過咪以為干地真係得閒到咁呀，實情係佢晒緊太陽都掛住足球，仲掛到出面。有外國傳媒就影到一輯干地喺意大利一個海灘嘆世界嘅相，見到呢位英超冠軍教頭好勤力咁「咪書」。咁到底干地睇緊嘅係乜呢？原來係一本教英文初學者足球相關用語嘅書，認真係學到老用到老呀。呢本書喺《Amazon》賣緊最平15蚊美金一本、即係唔使120蚊港紙，有興趣扮下干地嘅話，都可以買本試下。