公民黨多女將參選，陳淑莊頻頻曝光隨時睇厭，近日終於有新面孔出場，呢個女仔唔係候選人，係公民黨競選短片《公道》女主角。
短片喺YouTube有得睇，內容講後生仔受到嘅不公平待遇，目標係爭取年輕選民認同，成效如何唔知，女主角菁菁卻幾有新鮮感。據講菁菁係大學二年級學生，並非黨員，只係黨員友好，今次係友情式上鏡。

短片女角寂寂無聞，導演則幾有來頭，由時事紀錄片編導陳寶珣操刀，佢拍過唔少《鏗鏘集》，又曾往柬埔寨拍紀錄片《金邊之邊》，90年代初做過港產片編劇，作品包括《黑貓》、《契媽唔易做》及《伴我縱橫》等。
出選工程界嘅黎廣德噚日發佈政綱，雖然參加小圈子功能界別選舉，不過佢話堅持爭取普選。九華師弟梁家傑透露，黎廣德做學生會會長時由間選產生，上任後卻推行全校一人一票選學生會，結果接佢莊嘅梁家傑，成為九華首個普選學生會會長。黎廣德競選有個有趣之處，就係呼籲想捐款支持佢，但唔想公開嘅人，可以捐998蚊畀佢，因為捐款1,000蚊或以上就要開名。