珠海玩盡波子 斜坡深坑飆住去
秋風送爽,要出街享受吓先對得住自己,又是BBQ行山?唔夠刺激喎!知道保時捷會趁CayenneS及CayenneSHybrid喺珠海舉行Roadshow,仲搵埋自家一族喺珠海賽車場砌番餐,二話不說即刻撲去,可以揸住架百幾萬嘅CayenneTurbo喺野外穿梭,又可以舞住架Panamera落Track見彎過彎,即時令腎上腺素升。
記者:趙慧敏
攝影:趙慧敏
鳴謝:PorscheCentreHongKong
既然今次開宗明義係CayenneS及CayenneSHybrid嘅珠海站發佈會,廠方當然絞盡腦汁,將佢哋嘅功能發揮到有咁盡得咁盡,不過真係無諗過,除了Cayenne車系外,今次都出動其他家族成員,包括Panamera、Boxster、911Carrera4S,加埋從德國及馬來西亞等地專程而來的教練即場指導駕駛技術,無論是否波子迷,都一樣令人興奮到癲。
既然活動以Cayenne為主打,就以它作為頭盤,來個Off-Road作熱身。在賽車場旁的越野場,排成一列的Cayenne已經準備就緒,我二話不說便跳上一輛CayenneTurbo,雖然眼前是傾斜三四十度上上落落的大斜坡,又或者凹凸不平的深坑,但只要將車調校至越野模式,再按實際情況控制軚盤及制動,要征服這艱巨路段,突然變得輕而易舉。
由「森林」返回賽車場,賽道訓練正式開始,首個是Slalom,Slalom係乜?繞障訓練是也,即係我們熟悉的扭雪糕筒。這個計分賽事就用上Boxster,成255匹馬力的Boxster出名操控靈活,啱晒玩Slalom,一直畀住油左右扭動,唔止靠快,仲要睇位要夠準,入彎角度越窄,當然可以走快兩步。
講到Handling(操控),喺邊度地方適合得過賽道上,所講賽道當然唔係一條直路咁簡單,而揀定啲S彎及UTurn位畀我哋玩,教練仲擺晒啲雪糕筒收窄彎位,增加難度,不過今次車廠偏偏無揀我們公認玩FullTrack一流的911,反而用咗Cayenne同Panamera車系,似乎要話畀大家知,唔止跑車,保記出品的SUV及房車一樣跑得起。
■CayenneSHybrid落Track一樣見彎過彎。
最後一項是Braking(制動),煞車都要學?當然唔係一般煞車,面前以雪糕筒為標記,開住有成385匹馬力,由0至100km/h只需4.7秒的911Carrera4S高速向前衝,到達雪糕筒時大腳急煞,咁仲未止,由於衝力不可以即時制動全車,前面的搖旗員及以旗號示意車手向左或向右停車,好多人踩到車輪出晒煙,完全感受到高速急煞的刺激感,不過絕對唔係官能刺激咁簡單,最緊要學埋一旦遇上意外急速煞車,都要注意衝力,反應要夠快。