八方今日喺立法會見到工聯會麥美娟Alice,見佢瘦咗之餘仲轉look,娃娃少女味上衣令佢年輕又時尚咗,唔通單身嘅佢蜜運中,嚟個外型大改造?Alice聽完笑唔停,佢話自己瘦咗幾磅,無非因為聖誕期間受病菌感染,住咗三日醫院吊鹽水,相信因此令體型縮水,而著住嘅新衫,以前較肥時買落,但就有啲著唔落,宜家瘦返啲啲先啱衫,澄清轉look同感情事無關。
做咗22年區議員嘅Alice,原來每年初一都會落區會街坊,佢話今年一樣唔例外,最希望家人身體健康。八方打蛇隨棍上問佢,新一年想唔想有桃花?佢笑笑口話:「幾十歲人,唔駛嘞啩?」