年中唔少遊行上街,部份記者同八方心態一樣,陪住大隊走,其實採訪同參與兩種目的都有。今次事件中被摑嘅係一名交通警員,佢嘅交警同袍噚日亦同多部警車同鐵馬全程陪住,至於啲交警噚日係咪執行職務同無聲支持兩種目的都有,就要佢哋至知。
據知警方今次亦非常彈性處理遊行前需「七日前通知」嘅要求,喺星期六,一日之內就批出不反對通知,仲答應派人做糾察幫手維持秩序。
一向鍾意喺市民遊行期間搵攝錄機全程監察嘅警方,噚日不論自由黨嘅幾十人遊行,定網民發起嘅幾百人遊行都唔見影,反而一班首次參加遊行嘅退休警察,就不斷攞相機、攝錄機為自己獻出嘅第一次留念,仲不時同班現職同僚打招呼。有遊行市民事後即場問警員點解會咁,得番嚟嘅回應係「因為你哋好和平」。
社民連主席陶君行睇到咁多「異象」都話好感嘆,指平日即使只係幾名黨友和平示威,都俾大量警察圍住兼搵部攝錄機到實,唔知警方噚日突然收手唔做影像紀錄,係咪怕影到休班同袍示威,又指平日遊行好少見警方好似幫自由黨咁樣開路。