（新增祖兒回應）

都話咗，香港要搵個位泊車好難，有時見到明明有位…都可能泊唔到。

今午喺facebook群組「小心駕駛(討論別人駕駛態度)」入面，有谷友貼出一張相，話喺銅鑼灣一個商場見到兩架車泊咗三個車位，其中一部七人車仲好大份，泊正喺兩個車位中間。

而呢部車，原來係容祖兒嘅，佢下午兩點半就喺呢個商場出席活動。有人質疑係咪天后有特權、亦都有人話要向商場投訴……不過睇真啲，相片中三個車位都幾「窄身」，張圖嘅左方泊咗架車，係出咗少少界。

《蘋果》其後向商場公關查詢，公關表示：「係預留咗兩個位俾Joey，由於相片左方車輛泊得太出，如果七人車（即祖兒架車）泊去相中右邊嘅車位，咁中間個車位都唔夠位泊車，所以准許佢哋泊兩個車位。」公關又話，七人車係喺商場保安指示下泊車，又稱知道泊咗兩個車位，希望大家諒解。

至於祖兒則透過助手回覆稱：「了解咗係商場安排，兩個專用車位都係屬於祖兒，因為今日最終得一架車嚟咗，司機貪方便就咁泊。都明白呢件事會令到人不安，所以同司機講番，叫佢以後檢點啲。就算兩個位都屬於自己，都要泊得好啲。不過佢話（圖中）左邊架車都壓住黃線，佢都擔心恐防靠埋一邊泊，有人攝咗中間個位，大家上落車開唔到門，呢個都係佢哋作為司機嘅諗法。司機都冇心嘅。」

精選娛聞，喺晒《娛果》
http://fb.com/appledailyent