第六場三班1200米，澳洲好手潘頓策大熱門蘇保羅馬房之「光芒再現」，沿途居好位，直路輕鬆透出取勝。此駒單Win及組合獨贏A1，分別派31.5及18元。潘頓都算冷手執隻熱煎堆，須知如果唔係騎開的田泰安停賽缺陣，「光芒再現」相信幾難會落入佢嘅手中。
唔知係咪近期枕住有雨場地淋淋哋，幫到灰馬發揮，剛周日已經有「好易搵」及「再出奇」包辦田草最後一口孖寶，這晚再有另一匹灰馬四歲之「光芒再現」掄元，成為蘇保羅今季首匹四捷馬，本身至今跑九次清一色為谷草夜賽，豪奪四冠一亞一季一殿，大有條件追逐下屆跑馬地百萬挑戰盃桂冠。
今場第二名為「摯友無敵」，此駒早段跑得有聲有色，直路頂到一輪至畀潘頓「光芒再現」追過，騎練蔣嘉琦及文家良唔可以繼周日「好友心」後再次攜手贏馬。至於「御綵」匆出續配雷景勳，臨尾冚過雷神座騎「確威龍」跑第三，方廐守齋個幾月仲未破到悶局，「確威龍」則獲梗頸四，四重彩派5,306元。