今日係田蕊妮38歲正日生日，老公杜汶澤噚晚特別為老婆搞咗個生日P，今日壽星女就喺社交網貼相，相中除咗切蛋糕指定動作，仲有田蕊妮肉緊錫老公面豬，而除咗成班好友，在座嘅仲有田蕊妮爸爸。

開生日P之餘，田蕊妮亦留言對今年3月離逝母親嘅思念：「一個充滿歡樂，驚喜，開心的晚上！謝謝杜先生(杜汶澤)為我安排的生日晚宴，讓我所有的至愛都聚集在一起！今年經歷了很多，有些是我無法面對的痛，但我知道慢慢會好過來的，但願我的父親，朋友們都身體健康，平平安安，珍惜當下的每一刻，常存感恩的心！」