劉德華嘅fans club「華仔天地」，不經不覺成立30年，唔少忠心fans跟咗華仔10幾20年，甚至已經30年，正如華仔所講，唔少fans由少女到依家已經結婚生仔。

華仔向來待fans如家人，佢對呢班忠實fans 亦好識做，好似如果入會滿10年，就會獲華仔送贈一枚999純金打做嘅金牌，並刻有「老人精」字樣，滿20年嘅忠實fans ，同樣獲999純金金牌，但刻上「長老」字樣。至於滿30年嘅忠實Fans，噚晚就未有頒發，相信到下半年先有滿30年年資嘅fans，唯有留待明年先頒發。

而噚晚現場有唔少華仔商品售賣，如T恤、購物袋、水杯、記事簿、手繩、充電器等，唔少商品一早已經賣晒，當中最受歡迎嘅有價值$90元嘅T恤、$100元嘅購物袋、$300元嘅充電器及$138元嘅手繩。當中價值$280元，有華仔嘜頭嘅30周年成人版八達通卡，限量1000套，今日就有人將呢套限量版八達通喺網上兜售，放售價$1,500元，炒高成5倍有多。

精選娛聞，喺晒《娛果》
http://fb.com/appledailyent