王冬勝日前走出來為裁員解畫，傳達兩個訊息：削減編制不代表人頭減少，3年後總人數可能會增加；削減職位亦影響香港的外籍僱員，不是針對香港本地人。估計主席范智廉與集團CEO歐智華應該「醒」咗王總一餐懵。一個應該內部低調進行的架構重組工作，無厘頭變成香港無良僱主大裁員，人人喊打，香港管理層難辭其咎。
「攞你命三千」計劃出台不必要地高調，而且時機錯晒，導致滙豐主席與CEO灰頭土臉。舊年前主席葛霖加入英國保守黨內閣，滙控爆發主席爭奪戰，有董事局成員插死當然接班的集團CEO紀勤，改捧他下屬數佬范智廉上位，當時外界認為范智廉擅長同政客及監管機構打交道，如果屬實，主席先生今次真係無辜。大裁員消息公佈，正好是煲呔成功爭取中央挺港做國際金融中心之際，而政府早已準備好去歐洲路演，推銷香港金融中心大有前途，仲要係煲呔親自掛帥出訪，比利時、英國政府都係高規格接待。

原本已安排煲呔在倫敦與滙豐主席及CEO會面，而香港呢邊就為煲呔送上大裁員作會面前禮物，如此粗心大意之決定，肯定令9月14號雙方會面氣氛尷尬不已。據說，會上煲呔真係發難質問范智廉及歐智華，搞到兩人塊面一時紅一時黑。
滙豐之所以係滙豐，因為公司文化與傳統，公司管理層由細路Cadet做到總裁，在三四十年間做遍不同地區，不同部門，當登上集團CEO之位，下一步便接任集團主席，前主席龐約翰與葛霖便是這樣一步一步走上來。這便是香港大英資集團及殖民地時代政府的「通才政務官」管治模式。但舊年主席之爭，逼走紀勤之餘也毀了這傳統。今日數佬、炒房高手、投行專家成為主流當權派，如果是通才政務官一派主政，多年歷練使他們有一定政治觸覺，點會將公司重組編制職級，為取悅投資界而大鑼大鼓，最終落得兩邊不是人。
添馬男