當年今日

隔牆有耳:肥馬親身撐港產片 - 李八方

蘋果日報 2008/06/26 00:00


肥馬表示三個月前就知道腦有隱疾,只係一直唔公開,佢如常工作,外人確係唔察覺有任何異樣。今年4月佢出訪浙江時,忽然去橫店探班,為拍攝電影《奪標》嘅工作人員打氣,事隔兩個月傳出佢因病辭職消息,好多人都愕然。
肥馬同唔少娛樂圈人士有交情,導演徐小明話肥馬探班,香港工作人員都覺得有他鄉遇故知感覺,又讚肥馬支持香港電影業,幾年前業界喺上海參加一個展覽會,肥馬半夜都到會場打氣,佢話咁勤力官員因病辭職,十分可惜。
得悉患病後,肥馬話要節制飲食,詹培忠卻指佢繼續暢飲紅酒,肥馬噚日澄清,話自己好聽醫生話,真係唔敢多飲。老詹可能飲大咗,一時糊塗都唔出奇。