落實六月抵埗萬事得Mazda6

蘋果日報 2002/05/29 00:00


早前,一直備受矚目嘅萬事得Atenza(即港版Mazda6),終於響東瀛本土正式開售;據亞Mark打探得知,呢部被視為該廠今年重頭戲嘅626入替新車,好有機會響6月下旬抵港,而代理為隆重其事,重打算響6月中招呼一班香港傳媒,遠赴珠海賽車場作實地測試㖭!呢部擁有歐洲血緣同穩紮車架結構嘅Mazda6,被視為媲美凌志IS200外,佢重擁有出眾嘅房跑車特質,又難怪代理會咁有信心響蜿蜒多彎嘅珠海賽道上,給傳媒作一次嚴峻嘅考驗啦!聽聞今趟率先打頭陣引入香港嘅Mazda6,會係配備2.0公升偈同4前速自動波嘅型號,既有齊皮椅、天窗及一切豪華設備,而高性能嘅Mazda62.3則要明年初才會抵港。而車迷所關注嘅售價,新款Mazda6離唔開會喺18萬上落,有興趣嘅車迷就要拭目以待喇!