草蜢喺紅館舉行六場演唱會，前晚做到第三場，啲歌迷晚晚都咁high，草蜢三子心情當然好，但蔡一傑前晚完騷揸車返屋企時，竟然發生交通意外，好彩冇人受傷，但佢個心就好唔舒服。

撞凹前車尾部

噚日馮仁昭致電問候傑仔，佢話自己冇乜大礙，只係想同被撞車嘅車主講句唔好意思。事發當晚傑仔揸車離開紅館，落橋嗰陣已經好塞車，去到理工大學附近，身邊啲車入面嘅fans見到傑仔，不停閃燈影佢相，咁啱佢隔籬線又有架車左穿右插，傑仔為咗避佢，就係咁撞咗落前面嗰架車度。
事發後該名車主即刻落車，見到自己架車嘅泵把凹咗，大叫一聲：「嘩！」傑仔不停saysorry，點知突然紅燈變綠燈，該名車主竟然乜都唔理，嗱嗱聲返上車走人，傑仔惟有開車離開。傑仔話：「撞凹人哋架車，我要向對方道歉，我個心好唔舒服，希望佢知我唔係有意，原諒我啦。」