嘉華國際（173）主席呂志和今年88歲，每次現身都俾人問佢幾時退休，難得佢唔怕煩，次次都畀個過癮答案。好似噚日佢出席一個捐款活動，有人又問佢幾時退休，佢就笑咪咪咁反問對方：「退休你養我呀？」認真識講笑。
呂志和一直都冇話退休，佢講到明退休唔好，千祈唔好退休咁話，佢仲醒華華多一句話：「叫爸爸媽媽唔好退休呀，打番幾圈麻雀仲好！」都啱嘅，人要有嘢做先至可以keep住有活力。

捐1.2億予北大　叫傳媒讀好啲書

唔退休，咁政府計劃用嚟做首置上車盤嘅安達臣道石礦場地皮又點睇先？佢表明公司有興趣投標，出價會相當進取，不過成功與否就真係睇運，「睇個天畀唔畀機會，唔畀咪笑吓或者流吓眼淚囉」。
不過佢就唔肯多講樓價，話「唔講喇，越講就越升！」佢只係叫年輕人唔好反對填海，畀政府搵多啲地，多啲供應先可以解決樓價問題。
講番噚日活動，呂志和捐出1.2億元人仔畀北京大學生命科學學院，成立「呂志和生命科學學院基金」。講到興起，呂志和叫台下傳媒「畀啲心機，讀好啲書」，轉頭補多句「不過你哋都夠好」，都話呂志和好有幽默感喇。

李華華
mailto:[email protected]