【做善事】阿Bob帶4名子女落深水埗 用利是錢買明哥飯票
蘋果日報 2020/03/21 18:01
林盛斌明哥利是錢
（IG圖片）
近日因肺炎疫情持續，學校復課無期，小朋友要留在家中溫習或網上學習，不過日日困住家中都要唞一唞。今日是周末，育有三女一子的林盛斌（Bob）就帶住4名子女出街，不過他帶子女去深水埗探「北河同行」的「明哥」陳灼明。
Bob今日在社交網貼相，相中有他和4名子女與明哥合照，原來他帶子女落區，將他們部分的利是錢去買飯票，幫助弱勢社群，他留言︰「我記得，由霏霏出世嗰一年開始，我都會將小朋友每年收到嘅利是錢，拎部份出嚟捐去唔同嘅慈善機構。今年，我選擇帶埋佢哋落去明哥度買飯票，等佢哋明白到有好多公公婆婆同基層人士，生活困苦到可能連一餐飯嘅飯錢都俾唔到！多謝明哥，你嘅用心講解同教導，令佢哋上咗非常寶貴同重要嘅一課，（雖然細路仔係完全唔知發生咩事）。最近睇過一本書，其中一句說話好打動我：『人生嘅終極意義，就係給予 （giving）！』希望呢個post提醒大家，如果你有能力，一齊付出少少去幫助身邊同社會上有需要嘅人。」
Bob以身作則教導子女，不單止獲網民支持，連陳自瑤、蔡宛珊、陳慧敏紛紛留言讚賞，而黃浩然更留言︰「有意義的事必須支持！」
黃浩然、陳自瑤都有讚阿Bob。（IG圖片）