李璨琛擔任監製兼主演賀歲電影《大盜演》，今晚在奧海城舉行首映，同場還有秦沛及子女姜文杰和姜麗文、樂瞳、鄺家瑜、潘伯仲、詹昊宸（前名詹瑞文）等。

對於賀歲檔有黃子華自導自演的《乜代宗師》、鞏俐主演的《中國女排》和彭于晏的《緊急救援》等打對台，李璨琛說：「我哋賀歲第二檔期上，壓力冇咁大，當然我哋呢部戲係主打香港市場，因為係一部本土電影，但對住子華好似蝕喎，所以我退而求其次，第二檔都OK，就算子華殺到落嚟繼續上，佢都已經上咗一輪。」會否擔心最近的社會氣氛令人沒有意欲入戲院？他說：「冇諗得咁多，只係希望大家可以搵個位輕鬆吓，而家香港都冇乜娛樂。」李璨琛表示會加強宣傳，多做謝票活動：「如果時間啱，帶埋Lucy（女兒）去都得，但睇戲就唔得，因為熄燈會驚，佢實扭計；今年喺香港過，等Lucy逗吓利是先，係時候要出動。」

樂瞳笑言想避年，因為經常被人催婚，她說：「頭先我搭的士，有個男人追住我，仲同我講英文，應該係韓仔，因為佢要抄我牌，我又趕時間，怕遲到。」李璨琛笑說：「咁你都唔like，結果冇拖拍。」

提到秦沛與子女首次合作，他們表示很開心。身兼執行監製及演員的姜文杰，他指邀請爸爸拍戲時感到很緊張，秦沛大派定心丸說：「我好希望幫個仔完成呢個夢，佢又做監製，又做後期，我一定支持佢，就算唔係為個仔，作為一個香港電影工作者，我哋係老一輩，都應該支持香港電影。」滿意兒子的表現？秦沛笑說：「希望再有下一部，即係功夫好囉！」下部會否加片酬？他說：「唔好叫我攞錢出嚟就得喇！」負責電影音樂的姜麗文，她直言一直十分期待一家人合作。

採訪：黃曉妍
攝影：沈健程

-----------------------------
蝙蝠俠誕生80周年
點擊即睇85頁經典大回顧
-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇