建制派對特首林鄭月娥過去一年的表現讚多於彈，指她有效改善行政與立法關係，但刻意避開政治敏感議題，建制派田北辰透露，自從林鄭上場後，至今再沒收到中聯辦的拉票電話，但建制派亦批評林鄭在DQ周庭一事上，「卸膊」給選舉主任，在最近「派錢」的問題上，表現未夠硬淨。

反對梁振英的自由黨，黨魁鍾國斌直言，林鄭上場後，行政立法關係改善了很多：「起碼佢會出席泛民各黨派活動（及捐錢給民主黨），以往真係未試過特首捐錢畀政黨，佢係好努力咁做緊。」鍾又認為林鄭透過施政報告接納民主派意見，表現出善意。

實政圓桌立法會議員田北辰指，林鄭與梁振英領導的政府，向立會拉票方式明顯不同：「林鄭上場後，我係完全冇收過西環（中聯辦）任何一個電話，關於拉票、投票或者做任何嘢，（以前有？）以前有，而家冇。」田又指，現時官員為拉票，十分緊張，「我得一票，你（政府）可以毋須睬我，因為以往都唔會因為我嗰一票，令到（議案）過或者唔過。」即使他不是某一個事務委員會的成員，相關官員也會來爭取他支持，田相信是林鄭下令官員，要求不要有議員埋怨政府無拉票。

經民聯立法會議員梁美芬認為，林鄭是公務員出身，擅長執行：「有時同佢提議一啲嘢，佢反過來會提出，如果喺公務員系統就要咁做，我覺得呢個係佢優勢，因為佢熟。」

但上述3位建制派指，林鄭有時只是懂走位，才令自己不致墮入危機中。梁美芬指林鄭迴避處理政改和廿三條的問題，令她毋須處於爭議風口，集中火力處理民生工作，故沒有牽動民間情緒：「佢係只講民生，少談政治。」

鍾國斌稱，林鄭在政府DQ眾志周庭一事上，政府立場不夠清晰，林鄭只將責任推給選舉主任身上，更令日後選舉變得不如以往般透明。田北辰指，林鄭在財政預算案後派錢，沒有企硬，認為她應擇善固執：「最後佢為咗唔想畀啲政黨窮追猛打，但佢一讓，就開始出事。」

記者 姚國雄

《蘋果》沙士15周年系列網站，正式登場：
https://hk.feature.appledaily.com/sars15