張兆輝最近為電影《黑白迷宮》宣傳好頻樸，單是前日（2日），佢喺廣東中山已跑足七間戲院謝票，吸引大批影迷到場舉牌支持，仲有少女粉絲送上花束，大嗌佢戲中角色「叉燒」好型！

戲中張兆輝同伍允龍有好多動作場面，張兆輝坦言唔夠伍允龍「揪」，佢話﹕「伍允龍有功夫底子，打鬥最為擅長，我就最叻開槍！電影海報我揸槍個甫士咁型，其實我都足足定鏡咗三分鐘。」

除咗槍戰，張兆輝喺戲中為咗幫愛妻同女兒復仇，都要演繹好多內心戲，司儀趁機大讚佢真實生活都係出名嘅好男人，張兆輝打趣話：「冇用！人哋話男人唔壞，女人唔愛，所以我咪只得我太太。」呢句說話真係曲線向愛妻晒愛，又成功贏取現場掌聲，難怪謝票尾聲時影迷爭相同呢位「好男人」自拍。