噚日係梅艷芳逝世十五年，早前郭羡妮、林德信、江欣燕、胡杏兒等參演一套敍述梅姐fans真實故事嘅電影《朝花夕拾 · 芳華絕代》，電影噚晚喺銅鑼灣舉行首映，除咗演員出席之外，梅媽覃美金與長子梅啟明帶同孫兒一同現身支持。

郭羡妮喺戲中飾演fans，好多喊戲，佢話：「冇滴過眼藥水去演，全部真心真意喊出嚟。」郭羡妮雖然未見過梅姐，現場聽住梅姐歌曲回憶湧現，被問到係咪失戀時常聽，佢笑住話：「失戀唔聽歌啦，想死咩。」噚晚係首次欣賞全套電影，本來都想預埋老公，但冇飛入場。戲中郭羡妮喊得激烈，老公會唔會睇到喊，佢話：「唔會掛，老公係鐵漢但唔柔情，本來我都好溫柔，但冇咗呢一面，拍戲佢見過我喊好多，咩技倆佢都知，如果真係喊佢會安慰我，扮喊呃佢唔到，我成日都同個女夾埋同佢講爸爸我哋好窮冇錢食飯，但佢都唔會理我。」

龔慈恩同林德信演兩母子，龔慈恩支持個仔追夢，而林德信就飾演一個真人真事，梅姐基金贊助咗一個歌迷去美國讀音樂，現實成為一個出色樂手，林德信演角色前有問過前輩同爸爸林子祥意見，個個都話梅姐生前好nice、好照顧人，故仔好感人。

龔慈恩今年有份參與林嶺東遺作《八部半》演出，和任達華演夫妻，由林嶺東兒子飾演二人囝囝，龔慈恩話：「消息好突然，拍攝時間唔長，見到佢對工作好熱誠，劇本係佢自己寫，講香港情懷。」龔慈恩表示和林導演拍攝已完成，未知何時會上映，因為有八位導演合作，每位導演拍攝不同故事。

至於同林嶺東合作有冇咩難忘回憶，龔慈恩話：「我哋嘅第一次合作，好多嘢我都唔清楚，佢好有佢堅持，拍攝完佢表示滿意嗰下，我就好開心，代表接納我認定我。」

精選娛聞，喺晒《娛果》
http://fb.com/appledailyent