據香港次文化語言達人彭志銘所寫，「白頭」即「無任何簽署填寫的抬頭」，稱「空頭」亦無不可，而所謂「片」是「單據、存根、憑證」之意。所以沒有賭本齋出口術，扮有錢，要其他人相信摻埋佢賭，咁咪就係賭「白頭片」。
若然無本照賭係「白頭片」，無備發債咪又係賭「白頭片」。不過通常賭「白頭片」者都只是虛張聲勢，裝模作樣。那有老美這般死皮賴活，明明係技術破產的經濟體，反而聲大夾惡，而全世界明知佢「空手入白刃」都仲要「焗賭」，死未？貨幣寬鬆政策說穿了也就是輸出財赤，債務挪移。再加上香港牢不可破的聯繫滙率，我們只有眼白白的看着港元持續貶值，物價不斷飛升。
前門拒虎，後門進狼的困境又豈是小市民能夠獨力可支。莫說是普羅升斗，就算是一般公司的老闆，亦要叫苦連天，經營成本不斷上漲，提價空間卻極有限。有商界友人承租的乙級寫字樓，租金不夠3年已經暴漲一倍，升幅媲美旺區黃金地舖。雖然業務勉強掹上零售車邊，然非奢侈品始終受惠有限。固定成本中，租金幾佔三分一，你說又有多少生意能夠兩年翻一番？
亦難怪很多公司不務正業，炒賣去也，怪只怪香港身處的畸形環境。我都是過來人，所以充份了解「生意淡薄，不如賭博」。各位不要誤會，我並不是事先張揚，以備將來萬一傳出「閒資盡博爆額對冲」的時候好作開脫。只是蔡版主當日在我上市不久的貼心話：「千萬不要行差踏錯，否則筆下如實照錄。」言猶在耳，不敢造次。但確實炒賣的誘惑只要可一，就可再，反正一件污，兩件穢，三件冇閉翳。
盧先亞