【英超】熱刺炒李城6:1 卡尼大四喜獨領射手榜!
熱刺愛華頓李斯特城阿歷斯山齊士盧卡古神射手孫興民哈利卡尼金靴
哈利卡尼大四喜,英超金靴叫糊!周四英超獨腳戲,李斯特城同熱刺無欲無求,一於大打開放足球,結果熱刺憑卡尼獨建四功同孫興民梅開二度下作客大勝6:1,其中卡尼更以26球喺射手榜獨佔鰲頭,分別領先愛華頓嘅盧卡古兩球同阿仙奴射手阿歷斯山齊士三球!
李城今仗有兩位正選中堅賀夫同韋斯摩根缺陣,基斯甸富治斯由左閘客串夥拍賓拿盧安尼扼守中路,造就熱刺前線球員大開殺戒。孫興民開波25分鐘就接應長傳突破越位,右路唔貪功下傳畀卡尼單對單射入,呢位南韓射手11分鐘後再接應迪利阿里「chip波」妙傳射入,為熱刺半場領先兩球。
換邊後李城表現一度有起色,59分鐘占美華迪有越位嫌疑下單刀,熱刺門將洛里斯出迎鏟走皮球不遠,輾轉由尼迪迪撞橫畀捷維爾,呢位左閘冷靜推入禁區射空門得手,為李城追近1:2!不過,卡尼63分鐘接應雲耶馬頭槌傳中射成3:1,加上李城其後以翼鋒迪馬雷格雷入替唯一正宗中堅賓拿盧安尼下變相中門大開,之後孫興民禁區頂右腳燙射「網仔」收死卡斯柏舒米高贏到4:1,加埋卡尼末段「倒模」式禁區頂勁射連入兩球,造就熱刺大勝6:1,賽後37戰83分繼續排第2,周日煞科將會作客篤定降班嘅侯城,李城就排第11,煞科戰留守主場迎戰般尼茅夫。而喺足智彩開出英超神射手賠率,卡尼更係熱到燙手得1.04倍,盧卡古同阿歷斯山齊士就分別有11倍同18倍。