54歲甄子丹因為電影《葉問》被封「宇宙最強」。

宇宙最強演荷李活電影《星際大戰外傳：俠盜一號》（Rogue One: A Star Wars Story）嘅失明武僧智刃嚴，勁吸like。

宇宙最強演《追龍》中嘅六、七十年代大毒梟「跛豪」，係咪可以挑機經典《跛豪》代表呂良偉？

子丹日前喺九龍灣接受《蘋果》專訪，佢直認接演跛豪有參考過呂良偉舊作，「一定有啦，呂哥又係我嘅死黨。」呂良偉當年為呢個角色增肥40幾磅同棉花塞口，佢演法係潮州怒漢crossover教父，成功塑熒造出經典螢幕跛豪。子丹喺26年後重演，佢必須有所突破，做過資料搜集，子丹造型上還原真實，「就算我唔能夠同呂哥比較，我都要有一定新鮮感帶畀觀眾，資料搜集跛豪係好瘦，無乜頭髮，我哋同荷李活特技化妝師研究過，係咪要似Johnny Depp（尊尼狄普）演過嘅黑幫人物，晶哥（王晶）覺得唔係拍記錄片，我哋只要從真實人物中啟發。」

子丹演嘅跛豪充滿霸氣，由內重視到外，特技化妝將子丹上下嘴唇加厚帶出江湖味，子丹設定跛豪由鄉下落香港打拚，應該食過夜粥打得吓，鼻樑要化到被打裂過。子丹也積極學潮州話：「我喺倫敦為《星》補戲，教授24小時喺我耳仔疲勞轟炸，潮州話好難學，好多口音，我又去跛豪故鄉生活體現，用咗幾個月準備，我好着重detail位。」祖籍台山嘅子丹苦學潮州話，連潮州人蔡志明都大讚佢講得好，子丹即場發揮講了一句「㗎機冷拍士巫傷肝」，聽到一頭霧水，原來係「自己人打死無相干」。

子丹瞓身投入角色，情緒短時間未及抽離，爆出唔少尷尬，「呢幾個月，我行路、講野、眼神同心態完全投入，嗰段日子係幾痛苦。我試過不自覺同囡囡講咗潮州話，佢猛問我講乜。我係family man，返到屋企要即刻抹走戾氣，第二日開工又要入返人物度，我要活喺兩個人世界裏，好大折磨。」

「好矛盾，演戲梗希望演到最好，等於大家會覺得我係『葉問』，成為一個icon，其實我係演啫。我都希望今次演《追龍》會成功。不過演埋今次，我唔會再演呢啲反派同咁沉重嘅角色，我真係覺得好辛苦，亦唔想拍呢啲戲種。我反而想拍一啲勵志片、校園片或喜劇，我o依家鍾意拍啲小朋友戲，唔知我係咪返老還童？」

子丹呢次扮毒梟，佢考慮以反面教材，家長指引下畀囡囡睇。「每套電影，我都希望傳遞正能量，王晶當初搵我，我知係反面教材，我好多顧慮，同時作為演員，我又覺得係一個大挑戰，我猶豫咗幾個月。」子丹一諗到抽離嘅痛苦，佢已下定決心唔再演反派。

《追》片都有為子丹過足戲癮，佢同演「雷洛」嘅劉德華首次合作：「華仔演技精湛，影帝級演員，佢對呢啲片種、題材經驗老到，同佢合作，我可以喺佢身上學到佢嘅心得、修養同睇法。」子丹同華仔向來公認要求嚴謹，連埋王晶就係《追》片鐵三角監製組合，子丹大爆同華仔有互相踢橋，一旦意見分歧，子丹話：「互相畀意見，大家年紀咁大，係講道理，未碰過大家要企硬，會試各自版本，睇play back就知道好唔好，一套大製作有幾個監製係好事，唔同角度、聲音可以令一部戲全面發展，電影就係集體創作。」

子丹話同華仔最激係鬧交戲，互相指摘，互相試探，好有火花，子丹話：「拍前一晚，大家都會諗下自己意見，醞釀情緒，幾部機拍住，有時仲會爆肚。」跛豪同雷洛戲中動口冇動手，子丹話：「唔會有我突然中你一搥，但有位置上拉拉扯扯，我作為演員好享受，華仔啲戲咁好，好過癮。」子丹對《追龍》票房冇期望：「我唔諗，《葉問》都冇諗過爆，我覺得對得住良心拍好每部戲，唔好hea住去搵食，我對自己係好挑剔，次次演出都攞苦嚟受，相信咁先有激情。」

採訪：比華利、馮國康
攝影：沈健程
攝錄：Neo、吉吉
場地: The Glass Pavilion（E-Max）
化妝：諺瞳小白
髮型：Jacky Leung of IL Colpo PP