由玄彬同韓智敏主演嘅SBS新劇《HydeJekyll，我》將於下月首播，日前劇組終於公開一張玄彬同韓智敏首次拍攝嘅劇照。

照片中，韓智敏挽住玄彬嘅手，二人喺遊樂場看似好甜蜜咁約會，雖然韓智敏笑得一面燦爛，不過玄彬嘅眼神就非常冷酷而且木口木面，勾起觀眾對玄彬新角色嘅好奇。

新劇講述有雙重人格嘅玄彬，喺同韓智敏相愛後發生嘅浪漫故事。據知，玄彬為咗扮演人格分裂嘅角色，喺衣著同髮型等方面亦落足苦心，令劇迷非常期待。