之前講過「太子道太子」對「冇嘢講」千依百順要乜買乜,對佢迷戀已達瘋癲程度,所以太子準備嚟緊有假期會同冇嘢講出埠,連頭等機票都買定準備同佢去歐遊。點解要買頭等?咪因為冇嘢講講咗一句話:「唔,我未坐過頭等呀!」太子有嘅係錢,二話不說就用咗廿幾萬買咗兩張頭等飛。不過好事多磨,屋邨妹出身嘅冇嘢講,大家唔好真係以為佢唔講嘢,佢不知幾大口,周圍同人講坐頭等連去邊同邊個去都講埋,最後咪引到成班狗仔隊買晒機票陪佢哋飛囉。搞到太子嗱嗱聲取消晒機位,雖然𠵱家都未諗到去邊,但一句都冇嘈過女朋友,你話太子幾愛佢呢。
撰文:關仁