周麗淇（Niki）今日喺尖沙嘴海港城，出席其代言嘅鎮金店新店開幕典禮，提到家姐周汶錡誕下次子Avner，Niki就笑姨甥仔Avner似一嚿飯團，哥哥Jacques就快要返學。

Niki透露聽日係姨甥仔Avner滿月，已經準備咗金飾送畀姨甥仔，指細佬Avner好似哥哥Jacques。Niki每次返港都會家庭樂，帶小朋友去公園玩，哥哥現時好聰明，有啲嘢叫佢講一次，佢已經記得，好可愛。

至於感情方面，Niki坦言：「冇乜大進展，又冇人催我，我唔急，要到就會發生，隨緣啦，朋友好多介紹，個個都話呢個好嗰個好，但係我都冇時間出去溝通，不過有feel就唔使藉口，同埋我經常會唔覆機，試過朋友介紹啲friend問我攞電話，我話我冇電話，自己都覺得好好笑，又曾經試過畀錯號碼人哋，咩方法都試過，總之唔鍾意你就會想盡方法去推。」