立法會財委會今早續審議涉款240億的「抗疫基金3.0」撥款，預料最快今晚表決。民建聯多名議員會上一邊聲稱不滿「抗疫基金3.0」內容，一邊表明會投票支持通過，黃定光更在會上公然「爆粗」，指政府聲稱要聘用很多人手才能找出需要受助的人時直指：「如果我公司係咁，仆街啦真係」；與會的政務司司長張建宗稱多謝黃「語重心長」，並稱會「鞭策自己做好啲」。在建制派議員的護航下，工黨張超雄提出的中止動議遭否決，而議案最終亦於傍晚獲通過。

最新一輪抗疫基金仍舊漏網處處，大部份民主派已表明政府若不修改內容，會投票反對，而民建聯黃定光亦似乎對政府有「不滿」。他今早發言時指港府近年做了很多好事，「（但）做出嚟嘅效果都好似壞事」，批評政府制定政策時考慮非常粗疏和簡陋。當談到政府聲稱要聘用很多人、才能審查以找出真正需要受助的巿民時，黃定光更「爆粗」說：「平時佢哋（政府人員）食乜嘢啊，唔使做呀？吓？做多一啲嘢就要請多啲人？如果我公司係咁，仆街啦真係！死人啦！」，說法惹來在場議員和傳媒譁然。黃定光隨即「補鑊」說：「唔好意思」，並附以普通話聲稱自己是指：「如果我公司係咁，真係『不該』喇！」。今早主持會議的財委會副主席陳振英聞言後即說：「請大家多用議會語言，唔好咁粗俗」。

黃定光其後繼續批評政府，指民建聯覺得「無可能阻攔」抗疫基金，但指對政府今次措施「深表遺憾同不滿」，希望政府「唔好坐喺冷氣房閉門造車，諗埋啲不切實際嘢出嚟，俾人指摘和招致不滿」。政務司司長張建宗回應時則稱：「好多謝黃議員語重心長」，並稱會「鞭策自己做好啲」，又強調政府知道民間疾苦，但由於目前政府赤字達到空前最高，加上前景充滿挑戰性，故此必須謹慎處理，「我哋喺個平衡始終有啲偏差，希望大家明白我哋嘅困難」。

民建聯主席李慧琼在財委會上多番要求張建宗交代政府何時可以落實「健康碼」，並在通關時向基層巿民提供廉價的檢測服務，張建宗回應時只稱港府和巿民一樣「好心急」，但指港府在10.1或之前通關的「機會唔高」。

當被李慧琼追問能否11月通關時，張亦未能回應，只稱一直與粵方緊密聯繫：「我哋爭取邊個時刻做到，我哋第一時間就做」，又指會認真研究李慧琼提出的建議。

民主黨尹兆堅關注疫情下租金仍然高昂的問題，質問政府曾否要求地產商不要「攬炒」賺得太盡，以免出現商舖倒閉潮？張建宗回應時則透露，特首林鄭月娥曾經親自見過地產商並作出呼籲和溝通：「知道有啲業主的確做咗啲回應，有啲亦都坐喺度唔郁，所以呢個係我哋面對嘅挑戰。」張指在自由巿場下，政府「好難逼佢哋（減租）」，稱政府本身的短期租約已經全部作出寬免和寬減。

張建宗其後回應謝偉俊追問時再指，林鄭曾經在不同場合與地產商會會面，呼籲地產商減租，「我了解小部份正面回應，但好多都無積極回應」，形容情況是「反應唔理想」，指政府未來會繼續呼籲。

上周現身立法會出席財委會會議途中遭到民主派議員截擊請願，要求港府派員到深圳了解被拘留12名港人情況，並要求親自與家屬會面的張建宗，今早出席財會時提早約10分鐘「搵路走」，未再經上次遭截擊的通路進入會議廳，並在順利進入會議廳時向記者揮手。

財委會下午繼續審議第三輪防疫抗疫基金撥款，工黨議員張超雄提出中止動議，批評「廢柴政府」未做好準備就申請撥款，即使回應提問都是「Hea我」。張指出，政府至今推出3,000多億元抗疫基金，卻未有用於「最痛嘅地方」，舉例指疫情奪去百多人性命，當中大部份為院舍長者，但政府至今僅投放3,000多萬元用於院舍檢測，受疫情衝擊最大的低收入貧窮家庭、露宿者都未獲援助，「送畀老闆無所謂億億聲」，質疑政府不當使用公帑，「隊晒去老闆荷包就當做咗嘢」。

民主黨胡志偉亦批評政府「鐵石心腸」，拒絕推出失業援助金，「保就業計劃夠係臨時，補完又補補完又補，補咗咁耐都係千瘡百孔，咁你又補落去？」他認為保障打工仔生活亦可以臨時計劃形式推行，指政府若接納跨黨派共同意見，以十萬人為單位，每人每月9,000元，以半年為期，僅需花費54億元，指摘政府依然拒絕推出計劃，反映政府對市民計較，卻對大企業及既得利益者「數以十億計咁豪出去」。

經民聯盧偉國反對中止動議，指抗疫基金涉及購買疫苗及支援醫管局等急切措施，為「救命錢」，強調無論如何都要通過撥款。

最終張超雄提出的中止動議在建制派議員護航下遭否決，而在上周五及今日舉行兩日會議審議後，財委會今天傍晚以37票贊成、23票反對通過第三輪抗疫基金撥款；民主派議員提出的14個臨時動議，包括全民派錢一萬元、向失業人士發放為期半年、每月9000元的失業援助金、為持牌小販提供津貼等，亦全數都被否決。

●贊成（37票）：民建聯（13票）、經民聯（7票）、工聯會（4票）、自由黨（2票）、新民黨（1票）、實政圓桌田北辰、勞聯潘兆平、謝偉俊、何君堯、陳振英、馬逢國、廖長江、姚思榮、謝偉銓、醫學界陳沛然

●反對（23票）：民主黨（7票）、公民黨（5票）、專業議政（5票）、議會陣線（4票）、工黨張超雄、熱血公民鄭松泰

註：財委會主席陳健波按慣例不參與投票

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！