有報道話內地人士投資650萬元,即可居港;個別樓盤加價,去貨仍然暢順。呢啲新聞,對地產股有利。只不過地產股升幅已經唔細,驚住升幅有限,暫時最好畀啲耐性,等地產股回吐,先至諗吓啲地產股Call輪。
上周六提過滙豐Call輪9845。𠵱家揀輪買,有啲困難,認為個市會回吐買Put輪,驚個市挾多一挾,買Call輪又怕個市高處不勝寒。9845可能係唔錯選擇,博滙豐(005)近排反覆一輪後再上衝。滙豐只要郁一兩郁,9845就有機會升10-25%,皆因溢價唔高,得1%,而槓桿率則有13.5倍。9845一日有46球易手,賺蝕都可以好快計數離場。
電盈輪9791吼低買
以前提過隻滙豐較冷門Call輪9836,如果有心理準備揸耐些少,博滙豐幾個月內升十元八塊,又如果所買不多,則亦唔使擔心交投有限嘅因素。9836數據其實靚到絕,明年2月先至到期,輪價1.25元,勝在有負溢價0.1%,而槓桿率8.1倍亦唔算低。未來5個月內,滙豐若然升得10%,隻輪會升8成,咁嘅可能回報,一啲都唔輸蝕。
其他Call輪,暫時冇乜特別心水。上周五提過嗰隻電盈Call輪9791,可以吼回軟時上車,博電訊股由中移動(941)帶動下向上移動,帶挈電盈(008)爬番上去。
章盛