對於MIRROR上周五推出新歌《IGNITED》的「Too Hot To Handle Version」MV,有網民不滿經理人兼MV導演花姐偏心姜濤、Ian和Anson Lo,隊長Lokman與姜濤、Stanley、Anson Lo和Tiger一同現身首映時,Lokman表示:「一首歌要分勻12個係唔容易,每首歌都有佢嘅特色,而我哋每個特色都唔同,所以要跟特色去分配番。」他更透露這首歌有另一個MV及Version,將在稍後推出。問到會否有hard feeling?姜濤說:「其實事前冇預測過有呢個反應,點解有兩個Version,係希望大家可以專注喺跳舞方面,所以我哋冇諗過邊個搶多邊個搶少,下個Version先係我哋唱得平均。」會否擔心歌迷掀罵戰?Stanley說:「可能fans會將焦點放喺MIRROR一首歌入面,但我覺得MIRROR其實有好多元素,例如我偏向劇、演員為主,所以每一個都可以係主。」會否影響兄弟情?Lokman笑指這是少事,姜濤說:「大事都唔會。」其他成員即笑說:「未必㗎,睇下大事係咩啦,搶人飯盒唔得㗎!」向來為食的姜濤笑指:「呢個我都唔得!」