又到北美大型GameShowE3開鑼，美日廠商爭住曬冷來年重頭新Game，事前吹到行嘅PS4未有蒲頭，不過SONY一樣好重殺氣，有《戰神》奎爺嘅鏈刀勾住入場人士眼球，又有集合PS明星群毆嘅大亂鬥，仲有講香港粗口嘅黑幫遊戲《SleepingDog》，連北斗之拳都出場「啊~打打打！」，絕對人強馬壯、殺敵氣氛濃烈！
記者、攝影：韓繼聰

E3官網：http://www.e3expo.com

《戰神》延續暴力快感

今年PS3着實有唔少重頭大作，搞到PS展館佈滿排隊人龍。其中最具份量，當然係明年先登場嘅《戰神》新作，吸引咗長長人龍等試玩。試玩一輪，見到主角奎爺又有新招，邊拉邊斬兼飛上天，加上招牌牛頭羊身巨型怪物，大家廝殺得相當刺激。同場還有一款值得港人留意嘅遊戲《SleepingDog》，似《人中之龍》咁玩黑幫仇殺，在港取景夠親切外，路人甲乙丙仲會講廣東話粗口，唔捧場都唔得啦。

家用機手提機連動互揪

另一注目點，就係今年力谷嘅連動玩法。現場示範咗《街霸×鐵拳》，打通咗家用機同手提機平台，兩幫玩家隨時隨地較技，即係遇到嘅高手數量將會倍增，格鬥迷自然玩得更興奮！而且連動相當流暢，完全同步，機迷毋須擔心有「Lag」問題。另一款連動大作，就係四人混戰嘅《AllStar大亂鬥》，集合咗呢20年PS經典遊戲角色，包括戰神、肥公主、Drake等等，喺設計繽紛豐富的場景中大激鬥。現場設多部機試玩，四人齊打，戰況華麗激烈，唔少玩家試玩完，都話開頭唔慣咁大個場景亂鬥，但越玩越覺得夠瘋狂刺激，加上角色豐富招式特別，好期待正式推出咁話。

齋睇都吸引

除現場試玩，尚有多款大作只提供影片，但都吸引到唔少機迷駐足觀看。