hmvod原創劇《向西聞記》今晚喺灣仔舉行煞科宴，出席演員包括張繼聰、胡杏兒、陳意嵐、趙永洪、李美琪、張建聲、白健恩、陳詩慧、王宗堯、鄧健泓及石詠莉等等。

最近體重上升明顯嘅張繼聰表示，正準備19年2月尾拍攝一部有打拳嘅電影，在戲中飾演拳手嘅張繼聰表示，需要增加體重及努力健身，張繼聰話：「o依家要不停練大隻啲，等拍之前會再減番，自己發育嘅時候都未試過生咁多肉，早幾年都好肚餓，o依家可以有飽飯食，因為o依家個造型麻甩啲，可以接拍好多唔同嘅麻甩角色，但遇到有關嘅題材，好似之前有人搵我拍MMA都推咗，齣戲自己有參與劇本創作，除咗講打拳，仲有溫情、激勵。」

張繼聰今次用兩年去準備是次角色，佢話：「o依家跟個教練去練大隻，但係個教練教我做動作，係佢十歲嘅時候做，我o依家三、四十歲，就連企都覺得攰，自己都好想試下用兩年去準備一個角色，拍打拳前仲有3部戲要拍，其中一部講我要坐監，我係咁多個角色裏面最大舊嘅，但係又要扮好怕事縮埋一邊。」

張繼聰透露，自己由145磅增至現在180磅，佢話：「身體上面嘅線條都休息，網民話見到我最近嘅演出，以為我將個頭key咗落另一個身，問我做乜文戲都要揾替身。自己都幾享受而家有飽飯食嘅感覺，不過嚟緊12月就要再減。」張繼聰透露，o依家手臂有15.5吋、胸圍更加達44吋。

今次同張繼聰拍攝同一個單元故事嘅胡杏兒表示，張繼聰喺劇裏面會講粗口，杏兒自己就有少少粗魯，杏兒話：「如果角色有需要都可以粗魯少少。」對於內地爆出有「陰陽合約」，枱底交易，胡杏兒話：「其實一定要小心，所有嘢自己都會小心去做，自己一直都循規蹈矩，唔擔心，不過我o依家返內地拍劇主要係唔捨得離開小朋友，相隔太耐同太遠，可能會安排小朋友返內地探我，盡量安排喺香港工作。」

精選娛聞，喺晒《娛果》
http://fb.com/appledailyent